345滋味。醬燒豬仔骨

O

呢個豬仔骨係近期既最愛，諗到呢個新整法完全因為想清左雪櫃樽海鮮醬，但估唔到又幾好食。妳姐夫話送啤酒超正~~

但點解呢個叫「345滋味。醬燒豬仔骨」？
因為佢主要係用3種調味料，每樣45g 或者3湯匙，所以我就直接叫佢做「345」，方便易記！

糖不甩

呢個糖不甩做法簡單，隨時想食，20分鐘就整好！

材料：（2-3人分量約14粒）

糯米粉 100g

室溫水 80ml

椰絲 2湯匙

花生 2湯匙

芝麻 1 湯匙

糖 1.5湯匙

做法：

1. 先準備糖不甩既靈魂---椰絲花生糖碎。

將花生壓碎，再同糖、芝麻、椰絲撈均，試味夠甜就可以。

2. 之後再搓湯圓。

準備一個大碗，將糯米粉加50ml 水用手搓均，之後再續少續少加水。目標要搓到粉團柔軟同時又唔黏手。

80ml水唔需要用晒，夠就可以。如水太多過濕，可以加少少粉再搓。

3. 搓好粉團就可以搓成細粒湯圓。

4. 煲一煲水，水滾落湯圓，煮3-5分鐘。湯圓浮起後計1-2分鐘就代表完全熟透，可以上碟。

5. 湯圓上碟排好，再將準備好既糖碎碎加上面就完成喇！

上湯芝士龍蝦配煎米粉

一到夏天，你都知我屋企既龍蝦就不停有供應，所以我都不停諗D新既煮法。等大家唔好食到咁悶。

今次你阿媽黎探我，即係我媽見到又有新鮮龍蝦，話想食中式上湯芝士焗，但我屋企無伊麵，只係得米粉。咁唯有發揮下我既創意，整個煎米粉去試下配上湯芝士，最後估唔到又幾好食！阿媽話好食過配伊面，無咁濟～

超簡易3重芝士Pizza

家姐有冇發覺屋企成日都有D剩餘食材，又唔知點用呢?

因為早排買左pack墨西哥烤餅….
蘸咖哩食既，但食唔晒又唔知整咩好….

忽發其想，不如將烤餅當pizza底，加埋屋企有既材料，

焗返個簡易pizza~~~

牛油帶子伴墨汁意粉

之前行街見到有淨墨汁賣，即刻買定煮煮新意思先~

因為曾經買過黑色個D既墨汁意粉，感覺上唔多墨汁味

今次試下直情用墨汁炒~~好得wor~~

食既時候加埋爽脆既蟹籽撈勻墨汁意粉…好好味呀~~

家姐我上次送左幾包俾你，可以學下野啦!呵呵~

材料: (約2-3人份量)

意粉     半包

墨汁      4小包

帶子      隨意

牛油      適量

橄欖油   約3湯匙

蟹籽      隨意

調味料

鹽          適量

黑胡椒碎    適量

做法:

1.     先滾大煲水，水滾後放意粉，加鹽， 按包裝袋上的時間煮

2.     煮好既意粉用筲箕隔水放好備用，留起1碗煮意粉水

3.     墨汁倒入鑊用3湯匙橄欖油及半碗煮意粉水開稀，加熱煮及撈勻

4.     倒入意粉，加鹽及黑胡椒碎，不停炒，
   直至所有意粉都均勻粘滿墨汁
   (中途如果覺得汁開始乾，可適量加意粉水煮開)

5.     急凍帶子，解凍抹乾水，用另1個平底鑊加牛油

6.     放帶子，加鹽及黑胡椒碎調味，煎兩邊金黃

7.     意粉上碟，加上帶子及灑上蟹籽

8.     食得啦!!

妹妹心得:

*因為墨汁本身比較”杰”而且帶有咸味，所以要開稀及唔好加太多鹽

*急凍帶子一定要盡量抹乾水先煎，否則會較易痴底

*加蟹籽真係好食好多

*咖哩蜜糖雞翼*

香港韓風繼續大熱…之前係旺角試左間新開烤雞!

佢主打咖哩蜜糖烤雞，一惹味一甜，而且唔炸感覺冇咁熱氣

一於係屋企試下整!!!估唔到另一半都大讚!!!~

食到lamlam脷!!!!~

短片示範:

抹茶心太軟

朱古力心太軟就食得多，
但其實我同家姐都好中意食抹茶既野，
今次趁家姐返香港，一於整個抹茶心太軟賀一賀佢。
抹茶心太軟食落冇咁膩，
襯埋雪糕一凍一熱perfect match!!!
真係越食越好味呀~~

白飯魚煎蛋

其實我地香港人既家常小菜都唔少，可以有好多可以分享。

返香港前，我見到海鮮店有白飯魚賣，就買左一包返去煎蛋，
估唔到我仔非常鐘意，一路食一路講好多baby fish，
我諗阿妹你都應該好耐無整呢個餸，
今次我示範完，你又煮下！

材料：

蛋  4-6 隻

白飯魚  半斤

鹽  半茶匙

糖  半茶匙

燒酒  少許

麻油  少許

胡椒粉  少許

做法：

1. 白飯魚沖洗後，盡量晾乾水

2. 打發雞蛋，落鹽、胡椒粉同麻油調味

3. 中火開鑊落油，先炒一炒白飯魚，灑少許酒去腥味

4. 白飯魚炒至半熟，即有一半變白色，即上碟，隔水備用

5. 隔走白飯魚既水份，將白飯魚同蛋漿撈均

6. 中火開鑊落油，開始分批煎蛋餅，這個分量可煎3-4塊。
    蛋餅先煎好一面，再反轉煎

7. 完成！

姊姊心得：

*白飯魚一定要先炒到半熟，去左D魚水先加雞蛋煎，唔好貪快做少呢個，否則就會水汪汪

*食果陣配是拉叉辣椒醬會好夾更惹味

燉姬松茸蟲草花素湯

自從上次試過燉素湯後覺得好好味，
於是今次又自己試學燉下~

原來好多豆類都可以煲素湯，今次揀左3款試下….

家姐你外國呢D材料應該都幾難買….
下次返HK入定貨啦!

材料: (for 4碗份量)

姬松茸            1兩(約40g)

蟲草花            15g

紅腰豆            20g

黑豆                20g

腰果                20g

百合                20g

調味料:

鹽                 少許

做法:

1.      黑豆要預先浸最少2小時;
     姬松茸、蟲草花、紅腰豆洗洗預先浸30分鐘

2.      腰果及百合洗淨，連其他材料放入煲內，加4碗半水

3.      放在爐頭上煲滾

4.      一滾就立即熄火，放入蒸爐

5.      100c連蒸3小時

6.      出爐落鹽飲得lu~~

妹妹心得:

*其實好多豆類都可以煲湯，黃豆，眉豆都得

*今次我用LC 16cm，燉完冇咩走水，有4碗

*燉湯有人會落熱水直接燉，
  但我習慣整煲加熱入爐，較易出味

*士多啤梨法式拿破崙*

呢件餅，整完我自己都心心眼，
超簡單易做，但絕對出得大場面~

趁而家士多啤梨當造，快D整返個試下啦~
新年/ 情人節都大派用場呀~

*薑汁鮮奶燉蛋白*

冬天凍冰冰，食返碗暖笠笠既甜品真係最幸福既事呀~

阿妹我最近拎返部放低左好耐既慢磨機出黎，磨薑汁!!!

超方便耶，1舊薑大大碗薑汁….
而且磨完既薑渣都超乾…

薑汁可以醃肉喇，炒茶，今次就用黎整甜品…

炸菜蒜子炆腩片

呢輪香港天氣咁凍，大家都打邊爐，食煲仔菜暖身。
今次我就分享一個20分鐘快速煲仔菜，
等阿妹你放工快手煮個餸、烚個菜就可以開飯。

呢個腩片個汁有少少辣，好惹味非常好送飯！

材料：

豬腩片（新鮮/急凍） 一盒（200-300g)

炸菜                           一小包（80g)

蒜頭                              數粒

辣椒                              數隻

調味料：

水         250ml

蠔油      2湯匙

豆瓣醬 1湯匙

鹽         半茶匙

糖         半茶匙

燒酒      少許

做法：

1. 腩片沖洗後切細塊（2吋長），蒜頭去衣，辣椒切碎

2. 中火開鑊落油，先煎一煎蒜頭，再落腩片一齊煎，贊酒

3. 腩肉片煎到7成熟左右，落炸菜、辣椒同所有調味料，炒均，蓋上蓋煮5分鐘。

4. 打開蓋，試味後打上生粉水，
    就可以上碟，原煲上枱，又靚又保溫。

姊姊心得：

*有時間準備既話，炆五花腩都好好味。

*豆瓣醬有辣有唔辣，可以自己選擇鐘意既