[孕婦/母乳媽媽湯水] 鮮奶豆腐紅衫魚湯

無論孕媽媽/母乳媽媽要飲多D魚湯，
除左蕃茄魚湯，都可以煲鮮奶魚湯~

一樣鮮甜有益又有營養~~

我煲湯時會將紅衫魚壓爛，更易出味!所以一定要隔渣呢~~

花旗參石斛燉湯

花旗參補氣、提神、生津止渴;
石斛滋陰清熱明目、養胃生津。
好岩我地湊小朋友成日捱夜唔夠訓，或者工作壓力大既繁忙人飲架!!
材料簡單，湯味仲好濃郁。
另一半放工夜返，回家有啖湯飲真係暖在心頭呢!

日月魚蟲草花煲節瓜雪耳湯

     去完旅行返到屋企，就最想飲湯~~
 呢款湯滋陰補腎嘅又健脾開胃，仲好甜~~

飲啖家常湯，真係好舒服…而家湊B好忙，少左入廚…

但煲啖湯俾家人飲感覺真好。

[坐月湯水] 杜仲巴戟黑豆煲豬骨湯

呢個湯之前久不久都會煲俾另一半飲，
因為杜仲巴戟舒筋活絡、壯腰强腎，對於成日返工要企要搬重野既佢好岩!!
但原來都好岩坐月時飲，補益氣血，產後氣血不足，
腰膝痠軟背痛既媽媽都非常適合，
但患感冒及體質燥熱人士不宜。(有問題可先請教中醫)

多數我都會去藥材鋪買D預先pack好既湯包，
價錢唔貴，又唔使自己逐樣執，簡單方便，
岩晒我地慳時間既媽媽~~

黑松露蘑菇忌廉湯

夏天有時真係冇咩mood食飯…但又唔想求求其一餐…
今次就煮左個西湯，配埋蒜蓉包~~一流!! 
懶得黎都要對自己好D~~haha

材料：(3-4 人份量)

 
白菇啡菇   400g
洋蔥      1個
牛油      20g
雞湯      500ml
麵粉      2湯匙
淡忌廉     100ml+ 適量 裝飾用
海鹽      適量
黑胡椒碎  適量
黑松露醬  適量

做法:
1. 白菇啡菇抹乾淨切片，洋蔥切碎
2. 先用牛油把洋蔥碎炒香至透明

3. 加入菇片炒一炒，再下麵粉炒勻

4. 下雞湯, 海鹽及黑胡椒碎調味，煮至滾起熄火
5. 利用電動攪拌棒將所有材料打成蓉

6. 加入淡忌廉及黑松露醬拌勻即成

配埋蒜蓉包真係好好味呢~

姬松茸太子參燉湯

最近天氣仲係忽冷忽熱，出入商場又凍...

即刻整返個燉湯打下底~~

姬松茸有增強免疫力、改善肝功能、補腎功效;

而太子參有補肺益氣、健脾生津、抗疲勞、增強機體抵抗力的作用

[孕婦湯水] 淮山蓮子肇實煲牛鰍魚湯

牛鰍魚性平，含有豐富蛋白質，碘質，有健脾養胃及補血之效，適合氣血不足之人食用。亦好岩女士/孕媽媽飲架~~

之前頂住個大肚行街市，打算買梳羅魚煲湯，
點知隔離左右幾個太太都推薦我買梳羅隔離既牛鰍魚煲湯
(成日聽到牛鰍魚好有益…但我之前唔知個D係牛鰍魚XD”)

佢地狂話牛鰍岩我飲，又話唔係成日有得買
佢地個個都買….咁我就唔執輸都買返幾條:P

[孕婦湯水] 蕃茄豆腐紅衫魚湯

大肚時經常飲呢個湯，因為魚湯鮮甜有益又有營養~~

含豐富鈣質，豆腐有蛋白質。

而且加蕃茄一齊煲，蕃茄既酸性更有助魚既鈣質溶於湯中!!

街市好多時有一份份既細條紅衫魚賣(好似今次5條只需$25蚊)，

好平而且比煲肉更好~~

我煲湯時會將紅衫魚壓爛，更易出味!所以一定要隔渣呢~~

魚翅瓜雪耳煲西施骨湯

最近天氣好反覆….

行街市個陣打算簡單煲青紅蘿蔔~~

點知阿姨介紹我煲魚翅瓜，一樣咁清潤!

而且食落口感一絲絲，爽口清甜

短片示範: 

蟲草花素湯

新年食左好多糕，熱氣野，零食，想清下腸胃，
就煲左蟲草花粟米百合素湯，

好甜又好潤，飲落去喉嚨舒服晒…

[健康素湯] 紅菜頭雜菜湯

放左幾日聖誕假期，大家都應該食左唔少豐富既大餐，
今日就分享一日簡單快捷既紅菜頭蕃茄素菜湯俾大家。
多食蔬菜可清清腸胃，俾身體休息一下，
之後再迎接2017新年倒數活動同美食！
而且紅菜頭、甘筍等材料煮出黎既湯，非常清甜，大人小朋友都會喜歡。

*花膠螺頭烏雞湯*

女仔幾時都要幫自己補補~~~

特別而家入秋，特別乾燥~飲啖靚湯，當堂潤晒!!!

花膠補骨膠原，螺頭滋陰，烏雞又補而不燥~

男士其實都好岩飲，特別夜訓捱夜人士，都要補返下!!

海底椰雪耳煲豬展湯

天氣涼涼地，有時朝早起身都feel到個人好乾咁~

所以要煲返個入秋湯水滋潤下

番茄牛尾湯

家姐~~你知唔知我未嫁之前係幾咁恨飲牛尾湯~

因為媽咪唔食牛，所以屋企唔會有牛食…

但出街飲牛尾湯/ 羅宋湯成日都會覺得唔夠濃，唔夠味道

終於嫁左，自己可以係屋企煲!!!
落足料，煲一大煲分2日飲或者加意粉當一餐!!正呀~

'雞泡膠燉湯'

前幾日上網，發現有好多人講雞泡膠對女仔身體好，可以調經、養生重話可以係水上人既秘方，會好易中架喎！講到咁勁，搞到我都想試下，話晒我都努力緊，想等妳個姨生仔有個伴嘛～～尋日放工開車果陣，重問緊老公澳洲邊度有得買呢D雞泡膠，就突然醒起，妳上次黎果陣好似買左包唔知咩花膠俾我，大大包細細隻。。。

因為妳地次次黎都買一大埋海味過黎，咩都有D，我收到就多數直接放上櫃，其實都唔太知有咩。就因為咁，我成程車就係咁估果包係咩膠，搞到我突然好緊張⋯

一返到屋企，即刻飛搏去廚櫃，最後係櫃頂搵到，原來真係一大包雞泡膠！ yeah!!! 妳真係好update兼勁8卦過我，無論興咩食咩妳都知～

網上搵到D煮法，我就唔想整糖水，總覺得花膠都係唔襯甜味。我就學左整燉湯，加埋自己湯盅+蒸爐既煮法，教左妳就當多謝妳既「先見之明」喇！

材料：

已浸發雞泡膠  2隻

白蓮   40g

百合   40g

圓肉（龍眼乾）30g

瘦肉   150-200g

滾水   800ml

做法：

1. 蓮子、百合同圓肉沖洗之後浸水15分鐘

2. 將瘦肉切幼條，同時要煲定水

3. 將所有材料平均放落2個湯盅，加滾水到8-9分滿，放入蒸爐，100c 純蒸2.5小時

4. 飲之前加少少鹽，就飲得

姊姊心得：

1. 蓮子洗果陣睇下係咪清晒條蓮子芯，我無睇清楚，頭先食左粒有芯既，好苦。

2. 一次可以燉2盅，個蒸爐重有位就用盡佢，同樣方法落花簱參加瘦肉又分2盅，燉埋俾老公飲，飲唔晒，第2盅留返第二日飲！

3. 麻煩妳教我點做蒸爐發花膠，我唔識同時唔想做我D靚花膠做白老鼠～～

燉姬松茸蟲草花素湯

自從上次試過燉素湯後覺得好好味，
於是今次又自己試學燉下~

原來好多豆類都可以煲素湯，今次揀左3款試下….

家姐你外國呢D材料應該都幾難買….
下次返HK入定貨啦!

材料: (for 4碗份量)

姬松茸            1兩(約40g)

蟲草花            15g

紅腰豆            20g

黑豆                20g

腰果                20g

百合                20g

調味料:

鹽                 少許

做法:

1.      黑豆要預先浸最少2小時;
     姬松茸、蟲草花、紅腰豆洗洗預先浸30分鐘

2.      腰果及百合洗淨，連其他材料放入煲內，加4碗半水

3.      放在爐頭上煲滾

4.      一滾就立即熄火，放入蒸爐

5.      100c連蒸3小時

6.      出爐落鹽飲得lu~~

妹妹心得:

*其實好多豆類都可以煲湯，黃豆，眉豆都得

*今次我用LC 16cm，燉完冇咩走水，有4碗

*燉湯有人會落熱水直接燉，
  但我習慣整煲加熱入爐，較易出味