生日慶祝- 焱丸水產

12月，除左有我最中意既聖誕節外!!! 

當然係阿妹我既生日月啦!!!

呵呵呵呵~~~

今次真係要紀錄低朋友帶我去食既呢餐生日飯~~

因為真係好正，勁開心超滿足!

「焱丸水產」海鮮浜燒~
當然係食日本風味既海鮮BBQ!

星期五晚book左8:30，記得一定要book台，因為好爆下!!

我地到左都要等差唔多20分鐘先可以入座…

等位時可以睇下menu先~~~

 每張台都會放定個烤爐，及唔同既調味料，亦有指示介紹唔同醬料既用途。

我地二人order左5點盛既刺身，1 set活貝大盛，
2個蟹噌甲羅燒，1隻大蝦同埋海鮮赤貝鍋+烏冬 & 一杯梅酒, 一杯啤酒

先上刺身，5款由師傅拍板決定，

 
三文魚，吞拿魚，帶子，馬糞海膽同魚 (唔記得名，哈)

所有刺身都超厚切，勁有質感同口感，而且非常新鮮! 

 
朋友本身唔喜歡食海膽，但都話佢既馬糞海膽不錯喔~~~
食到好味既刺身，感覺好幸福喔!

活貝大盛有2隻超巨帆立貝，2隻新鮮鮑魚，2隻蠔，4粒蜆…

逐樣逐樣慢慢燒…

隻蝦size都好大隻，夠我地2人分享，燒蜆好有海水味，鮮甜!

超巨帆立貝，2隻放上爐頭岩岩好夠位，台面會有D小貼士教點燒海鮮…

帆立貝已經切離殼，加清酒一齊燒至清酒燒滾再反轉….

為左原粒咁食，我地冇剪細佢…
所以食時裙邊有點過熟，但中間岩岩好，
好juciy一絲絲既帆立貝肉，好有口感又鮮甜。

鮑魚上台仲郁緊，啜實左個帆立貝殼~~~
放上爐燒超新鮮不停郁(其實都有少少殘忍^^”)，
燒到鮑魚唔再郁時，用較剪剪離殼，反轉燒多45秒左右就ok~

鮑魚燒得岩岩好(朋友大讚我手勢~嘻)，超爽口，一D都唔un~~正!!

最後燒蠔就一般般 (個人不太喜歡熟蠔)~~

蟹噌甲羅燒，要先將鵪鶉蛋倒入蟹蓋內，
拌勻松葉蟹膏、蟹肉、蟹籽，再放上爐燒至杰身就食得!!!
好邪惡呀~~但又好好味，濃郁的蟹膏加上卜卜脆既蟹籽~~~~

正，不過食到最後兩啖覺得咸左少少~~如果有啖白飯撈就不得了~

食晒海鮮最後上埋海鮮赤貝鍋+烏冬，
個鍋太滿，一滾就瀉，我見隔離台有點論盡，
所以一開始我用小碗盛走部分湯再煮，
鍋上台時，鍋內有1/3既紅色醬，已經即時問店員係咩黎，
店員只係話海鮮醬，咁就繼續煮，點知煮滾時辣到飛起，
同店員加左兩碗清湯仍然好辣，但
我地勉強都照食左 (雖然辣但個烏冬係好彈牙好食既)， 
 
menu內照片及字眼都冇註明係辣既…
所以大家要留意返，少少美中不足，
好彩另一店員見到，遞上兩大杯冰水，我地先爽晒!!!

餐廳環境報置到好似日本居酒屋咁，而且有幾個大魚缸養蟹養活貝。

要多謝朋友既生日晚餐。