煙三文魚一口脆餅小食(簡易版)

聖誕節好快就到，阿妹你咁多朋友，一定有好多大大小小既party 要去，有時可能要準備野食齊齊分享，今次就分享一個免開爐，15分鐘簡易版既煙三文魚脆餅小食俾妳，分量同做法都好有彈性，只要選擇比較好既材料，就一定會成為受歡迎既派對美食！

材料：(一筒餅乾既分量）
任何細塊脆餅乾  1盒

Cream cheese  1盒

牛油果 1 個

煙三文魚  200－300g

香草（新鮮/乾燥） 少許

黑胡椒碎  少許

靚大平碟/盤  1個

做法：

1. 將每塊餅乾都擦上一層Cream cheese，排好係碟/盤上

2. 用膠刀切牛油果，放一小片係餅上

用膠刀切，咁牛油果就無咁易氧化變色

3. 用手或較剪將煙三文魚撕成細塊，放上餅上

4. 灑上香草同黑胡椒碎

5. 成功！

姊姊心得：

*唔用餅乾，可以用青瓜片

呢個係我上次公司Party整既，一盤係青瓜底，另一盤係小多士～

*無牛油果就可以唔用

*煙三文魚可以換成熟蝦（cocktail prawns）或者火腿
*想貴氣D可以加魚子醬或金箔上面

*如果搵買唔到cream cheese, 可以用日本BB沙律醬代替，但份量要減少，因佢比較濃味

*如果有時間，可以先將cream cheese 同少量忌廉（比例大約10:1)連埋香草（Dill時蘿／Parsley）同鹽一齊用mixer/blender 打均，加強味道

*銀魚仔臘腸排骨煲仔飯*

終於開始有冬天feel，最岩食煲仔飯~~

係香港想食煲仔飯好容易，
但你人在澳洲….唔係話落街食就有

今次就等我呢個做妹既教你啦!!
下次可以煮俾你老公食~微微既飯焦佢實會好中意~

[好物推介] YOSHIKIN 具良治 GLOBAL 日本專業主廚刀

家姐我有好野推介俾大家，
就係YOSHIKIN 具良治 GLOBAL 日本專業主廚刀。
我今次買既係30週年紀念版 13cm 既主廚刀。
之前一直都知道呢隻日本刀好出名，
但一直都覺得貴，一直都唔捨得買。
（但係買其他煲煲鑊鑊又唔會話貴~~ 哈哈~~）
今次見到網上有折上折，最後都係AU$40 (原價AU$89)，
就決定買一把試下，睇下係咪咁好用。

收到貨幾日都未捨得用，
因為想等到一樣特別既食物先同佢開封，以示尊重XDD"

等到尋晚，老公又捉左幾隻龍蝦，
終於我就決定用龍蝦同佢開封，
兼試下係咪傳聞中咁厲害！

把刀攞上手好輕，把手好好握，
13cm 係刀鋒既長度，所以係中型既刀，唔算太細。

我第一樣測試係用佢起左龍蝦身上橙紅色個塊衣。
平時我用開既泰國Kiwi 刀，都算好利，
但都唔係咁易做到，好多時都起左埋D肉。

龍蝦身上橙紅色個塊衣，好難起

今次試用呢把具良治，真係非常好用，
好輕易就起到塊衣，乾脆利落，唔會起埋到塊肉。
同埋我發現，因為呢把刀係「一體成形」，
唔係刀加刀柄，所以用既時候力度同角度比較易控制，
感覺比較刀手合一。

我整咁多次龍蝦，都係第一次好成功咁去到塊衣！
好有成功感!!
因為食龍蝦刺身，塊衣清唔乾淨就唔好食。

真係有D後悔唔早D買，同埋應該襯減價買多幾把，
因為阿妹話香港都貴賣好貴~~~
而家唯有好好用住呢把先，
等聖誕節boxing day 減價再買。

紅棗花生雞腳眉豆瘦肉湯

自從上年開始，我每星期最少都會煲一煲湯。
除左因為有小朋友，多飲湯比較有益，
重因為妳姐夫上年唔知傾開D咩，
忽然就講其實佢好鐘意飲湯。
但我地一齊咁耐，都唔知佢原來鐘意飲湯，
以前一年都未必煲到10次，
而家佢開到口，咁我就努力煲~~

不過自從經常煲湯之後，
覺得食飯有湯感覺又真係比較圓滿~~

飲到老火湯或中式湯水，
係好自然會覺得好幸福，好有家既感覺～

原來除左食紫薯雲尼拿慕絲蛋糕 , 薑汁燉蛋有幸福既感覺 ，

一煲靚湯都有相同既幸福感覺。

今次我想同你分享呢個湯，係妳阿媽，
亦都即係我阿媽教我既，不過我自己再加埋紅棗一齊煲。

材料：

新鮮雞腳 8-10 隻

瘦肉/豬骨300-400g

花生 40g

眉豆40g

紅棗 4-6 

薑 1 小塊

水12 碗（約2.2-2.4公升）

做法：

1. 紅棗、花生同眉豆沖洗後，先浸水備用

2. 雞腳同豬肉沖洗之後，出水備用

3. 將水放入湯煲，雞腳同豬肉隨水落

4. 開大火，水煲滾之後落紅棗花生眉豆同薑。

5.水再次滾起之後，較小中火，煲大約2個鐘至2個半鐘

6. 煲好之後，可以落適量既鹽調味，飲得！

姊姊心得：

*浸紅棗、花生同眉豆既水，不要加入湯

*紅棗要去核

*雞腳的爪尖要記得斬，一來好睇D，二黎爪尖比較污糟

*紫醉金迷*--紫薯雲尼拿慕絲蛋糕

Wowowow~~~!!!!!!!!!!!!!見到完成品自己都勁興奮!!!超靚靚~~

淡淡既紫薯味，配上幼滑既雲尼拿慕絲…

每一啖都有滿滿既幸福感~

今年聖誕可以整黎做派對甜品，
又或者同三五知己係屋企high tea~~

諗起都開心，家姐都真係你一定要試呀!

 蛋糕材料及做法同早前綠茶紅豆卷蛋一樣，不過減半~

蛋糕材料 (6件份量，闊6cm):

雞蛋           250g (約4-5隻)

糖               85g

乳化劑       13g

低筋麵粉   115g

紫薯粉       20g

水              12ml

菜油          12ml

紫色色素  少許

雲尼拿慕絲材料:

牛奶              100ml

糖                  30g

雲尼拿香油   1湯匙

忌廉              200g

魚膠片           8.5g

紫薯蓉材料:

紫薯    150g

忌廉    50g

裝飾材料:

食用金箔    一小片

做法:

 雲尼拿慕絲:

1.      魚膠片用冰水浸丈軟，將忌廉打至企身

2.      牛奶小火加微熱煮溶糖，
      熄火利用餘溫溶魚膠片及加雲尼拿香油

3.      加忌廉均勻攪拌，放入雪櫃約20分鐘
      雪到比較”杰”及企身

 蛋糕:

4.      把雞蛋，乳化劑，糖用打蛋器攪拌至”杰身”

5.      將麵粉過篩一次

6.      將麵粉及紫薯粉倒入雞蛋糊中，再用打蛋器攪拌至”杰身”

7.      慢慢倒入油及水，攪拌至完全均勻

8.      逐少加入紫色色素至理想顏色 (焗完後顏色會比較深)

9.      焗爐180C預熱10分鐘

10.   長方盤牛油紙鋪底，將麵糊倒入焗盤

11.   將麵糊在焗盤上均勻地推平(蛋糕約1.5cm高)

12.   160C焗8-10分鐘

13.   出爐後，撕去牛油紙，把蛋糕嘆涼

14.   利用模具用刀界出圓形(每件紫醉金迷需2件圓形蛋糕)

15.   片去蛋糕金黃面

16.   將蛋糕放入模具底部，倒入雲尼拿慕絲，
     再鋪多一塊蛋糕 (不要太大力按壓，以免慕絲漏出)

17.   放入雪櫃雪至少4小時

 紫薯蓉:

18.   洗乾淨削皮後，切簿片蒸15-20分鐘至軟身

19.   利用hand blender把紫薯片加忌廉打至幼滑

 

裝飾:

20.   4小時後，利用火槍快速向模具燒一圈
     (真係要快手，約2秒)，以便脫出模具

21.   將紫薯蓉放入唧袋，於蛋糕頂部唧一圈

22.   利用牙籤將少許食用金箔放置頂部裝飾

23.   終於食得喇!!!!

妹妹心得:

*市面上有好多紫色外衣既紫薯，但其實薯肉係黃色架，
  街市比較少紫薯; 今次我係一田買，
  有3-4款都係紫色皮，但得1種係紫肉，
  所以購買時一定要問清楚

*因為紫薯粉係增加蛋糕味道，不能令蛋糕變成紫色，
  所以要加小小食用色素，唔加亦唔會影響味道，
  但蛋糕就會係金黃色

*利用火槍時一定要小心同快手，
  因為燒得慢，雲尼拿慕絲會溶，
  如果冇火槍用熱毛巾敷亦可

*食用金箔，食用色素及乳化劑一般烘焙店有售

*霸氣排骨*

有冇發覺蒸排骨黎黎去去都係豉汁?
蝦醬?梅菜? Or麵豉???

有時都悶悶地…
之前睇左韓國一個廚師煮野食節目...
見到廚師用左個特別方法整排骨~

我就參考左佢既做法，改良少少，夾返自己口味!!!

就煮成呢道「霸氣排骨」啦!!

軟綿綿既糯米+微辣既豆瓣醬!!
真係意想不到咁好味呢~

'芝士肉醬焗意粉'

呢幾日工作都好忙，跟著屋企又好似有唔同既野做，搞到我尋晚唔記得準備今晚要食晚野，放工返到去，打開雪櫃，得一盒牛肉碎。

你都知我每日煮飯時間得45分鐘到一個鐘左右，所以前一晚我一定準備好晒，但今日係得一盒碎牛既情況下，又要準時開飯，就只好出煮快餐既絕招---肉醬意粉！

如非必要，我其實係好少煮意粉，因為佢係煮快餐既必殺技，所以我會留返重要關頭先出手，咁煮完出黎擺靚仔佢，食果個（即你姐夫）就會覺得我係一早plan好煮意粉，而唔係臨急臨忙整既～呵呵~

呢個意粉30分鐘內一定煮好，而且材料簡單，屋企一定有～

材料：

肉碎   250-300g

意粉   半包（250g）

芝士   適量

粟米粒 (罐頭/急凍) 適量
意粉醬 

調味料：

鹽 2-3 茶匙

胡椒粉 少許

做法：

1.  先在一邊爐頭煲2公升水，水滾落鹽煮意粉，保持中大火，唔好蓋

2.  另一邊爐頭，開鑊落油，中火炒肉碎，中間落少許胡椒粉調味

3.  炒到肉碎8成熟，轉中小火，就落粟米粒同意粉醬撈均，煮到意粉醬熱，出煙微滾，就可以關火

4.  意粉跟據包裝上寫既時間煮好後，撈起放上焗盤，再將意粉肉醬淋上面，輕輕咁撈均

5.  芝士放面鋪好，放入焗爐做烤（Grill mode)，200度烤5分鐘，直到芝士溶同轉金黃就可以

6.  上枱先灑些少乾既paisley，就靚仔晒，食得！

姊姊心得：

*肉碎用豬、牛都無所謂

*無肉碎，隨手屋企有既腸仔、煙肉都可以

*而家大部分意粉都唔洗過冷河，用鹽水煮好，就可以直接加汁或炒

*煮意粉唔想意粉痴埋一齊，水分量要多，用水滾既衝力，令意粉分開唔痴埋。唔洗落油，無用架～

*薑汁燉蛋*

最近香港天氣乍暖還寒，
下午有時好熱，但夜左又涼返好多~~~

有時早左食完飯…..睇下電視又想搵D甜品食下~

今次分享既甜品，利用屋企多數都會有既材料….
30分鐘有得食，食完成個人暖笠笠!!!

知家姐你係澳洲成日6點就開飯(我放工仲返緊屋企囉~)

哄完阿仔訓覺，拿拿聲整返個甜品同姐夫Sweet下啦!!

'龍蝦膏蒸水蛋'

呢期上網見到個個都食大閘蟹，
見到隻隻都爆晒膏，流晒黃咁，真係睇到我流晒口水～ 

重記得上年專登係10月尾返香港，
就係為左食大閘蟹，不過今年，
就只可以隔住個mon 睇人地食......

好彩，無蟹膏，都重有蝦膏～

妳姐夫呢期好勁，今年澳洲既龍蝦季啱啱開始，
佢就捉到唔少，尋日又捉到幾隻生猛新鮮既，
所以我都唔客氣，即時劏晒佢，整返個「龍蝦膏蒸水蛋」，
慰藉我對「膽固醇」既渴求～

'終極港式茶餐。沙嗲牛肉'

嘩～～～我都唔知等左幾耐，先可以做到呢個終極食譜！！

妳家姐我如果要係柏斯食港式早餐B -- 沙嗲牛面，
真係飛返香港食重易D！
但上次我返香港食，一碗面得少少沙嗲汁同幾粒牛肉，
完全都唔夠喉。呵呵~~ 今日之後，想食幾多都有！
實在太興奮！！

不過當我好開心咁煮到之後先發現，原來你姐夫係唔"好"沙嗲牛，因為佢食開早餐C -- 雪菜肉絲米......

*明爐酸菜滾魚腩*

家姐妳平時煮D餸咁勁~~好彩今次我都唔弱~~~

妳用"上火碟"整玉子豆腐，
我就用同一款碟就整呢個充滿鮮味既滾魚腩~

呢道菜看似好複雜…但其實唔太難，只係材料稍多~

自己係屋企整…完全食到魚既鮮味!!而且不加味精又少油!

仲可以自行調教辣味~絕對健康又美味!!!

*鮮百合海底椰蓮子糖水*

香港天氣呢期好乾燥呀…成個人都好乾爭爭咁~~
分享呢個超潤既糖水…飲返碗舒服晒! 

但係澳洲有冇鮮百合同海底椰賣架??哈哈~

'醬爆鐵板玉子豆腐'

阿妹，上次買俾妳隻上火碟，好似無聽到妳話用過既? 妳唔好諗住只係整Pepper Lunch或者明爐烏頭先用到，其實佢用黎煮其他餸都可以發揮佢既獨特好處，今日我就教妳整個「醬爆鐵板玉子豆腐」。

呢個玉子豆腐係我地係呢邊唐人餐館食過類似既鐵板豆腐，跟著妳姐夫同我就一齊研究係屋企無鐵板可以點樣整，最後俾我諗到用隻"上火碟"就得，所以呢隻碟係呢個餸既靈魂~

*抹茶紅豆卷 & 芝麻紅豆卷*

剛剛呢個星期六日好鬼忙碌! 

今日又到星期一，又要努力返工喇~~

見今日係Green Monday
就分享一個零失敗又好味既「抹茶紅豆卷」比妳睇下~
我做細妹既對妳幾好~呵呵~