'龍蝦膏蒸水蛋'

呢期上網見到個個都食大閘蟹，
見到隻隻都爆晒膏，流晒黃咁，真係睇到我流晒口水～ 

重記得上年專登係10月尾返香港，
就係為左食大閘蟹，不過今年，
就只可以隔住個mon 睇人地食......

好彩，無蟹膏，都重有蝦膏～

妳姐夫呢期好勁，今年澳洲既龍蝦季啱啱開始，
佢就捉到唔少，尋日又捉到幾隻生猛新鮮既，
所以我都唔客氣，即時劏晒佢，整返個「龍蝦膏蒸水蛋」，
慰藉我對「膽固醇」既渴求～

今日有 5 隻，我一個人整晒，真係劏到手軟~

其實蒸蛋唔難，但劏龍蝦就要D工夫，
好彩經過差唔多過百隻既經驗，我都算有少少心得，
等我下次有時間，慢慢再分享劏龍蝦既技巧。

龍蝦膏，即係龍蝦腦，剪開蝦頭，黃色好似海膽果舊就係~

材料：

龍蝦膏（即係龍蝦腦） 

蛋                        3隻

水                       蛋份量既2-2.5倍

鹽                       半茶匙

不銹鋼碟一隻

做法：

1.  蛋打係量杯入面，記住分量，方便之後加水，再打勻

2.  將2 - 2.5倍既凍熟水加入面雞蛋撈勻

3.  將蛋液用過濾網過濾一次，隔走泡泡，倒入不銹鋼碟

4.  落鹽輕輕撈均，再將龍蝦蝦膏隨意放入

5.  用錫箔紙包好，蒸12-15分鐘，視乎碟既大細，蛋既厚度。

6.  出爐，食之前加少少蒸魚豉油就得！

姊姊心得：

*龍蝦膏（龍蝦腦）唔可以生食，一定要熟食

*用不銹鋼碟好緊要，因為佢傳熱快，同時散熱快，
 蒸蛋果陣受熱平均，到蒸到啱啱好熟既時候，
  散熱快就唔怕到食果陣變老蛋！
   所以雖然不銹鋼碟唔係咁靚，
  但我每次蒸水蛋都會堅持用佢！

*水既分量應該比平常蒸水蛋少，
   因為比較實既蛋先可以痴實D蝦膏，
   食果陣就唔會蛋還蛋，膏還膏。