TACO 墨西哥脆餅

墨西哥既食品近幾年越來越受歡迎，除左Nacho 之後，Taco 都好出名。我係澳洲都經常會整黎食，因為材料簡單，好快食得，偷懶唔煮飯，食佢都唔錯！

其實係屋企整都好容易，多數買一盒材料包，基本都有齊，加肉加菜就食得。
我係香港都見到好多地方有賣，多數包裝上都有教點準備，但我整左咁多次，都有些少心得，所以今次我就簡單示範一次我平時既做法。因為盒上既做法分量我覺得比例太多

材料：

Taco 材料包一盒

(Tacos 材料包有：脆餅皮或軟餅皮、肉醬調味粉同蕃茄伴醬。)

牛肉碎  350g

生菜   半個

細洋蔥  半個
水  150 ml

牛油果  一個

粟米粒  100g

蕃茄仔  5-6 粒

芝士碎  50g

酸忌廉  50g 

做法：

1. 先將生菜洗淨切絲，蕃茄仔切細，洋蔥切碎，牛油果整成蓉，備用

2. 中火開鑊炒牛肉碎，到5成熟左右加洋蔥一齊炒。到8成熟左右就加粟米粒、水同3/4 包肉醬調味粉，較細火煮5-7 分鐘到醬汁變濃，熄火前加入蕃茄仔，撈均就可以上碟。

3. 脆餅片放入焗爐140c 焗 5-8 分鐘，佢變熱同脆身就可以。因為本身已經焗過，所以好快就得，如果跟盒上說明180c 15分鐘，一定過晒火兼黑晒唔食得！因為我試過幾次都係咁~

4.  當肉醬同脆餅準備好就可以包黎食。

5.  其實夾餅既次序都好隨意，每種都包D就好食，我就喜歡先包生菜再加肉，加牛油果同蕃茄伴醬，最後芝士同酸忌廉放面。

6.  軟餅做法一樣，但如果想食多種口味，可以包雞肉條，好似咁樣！一樣都好好食！