澳洲鮑魚好出名，除咗大家熟悉的青邊鮑之外，仲有黑邊鮑同啡邊鮑。
就到母親節，所以身為媽媽既我，決定煮餐靚大鮑，慰勞一下自己！！
今次炆既係新鮮青邊鮑同啡邊鮑，之前炆過比較細隻既鮑魚，第一次炆咁大隻，但好彩都無失手，重非常成功！
今次既啡邊鮑比較大隻同軟身，青邊鮑就比較爽口，而且鮑魚味道比較重。
啡邊鮑炆好切開，好厚肉，好入味！
材料：
鮮鮑魚/急凍青邊鮑 （先解凍）
雞腳 6-8隻
乾瑤柱 3大粒
瘦肉 半斤
雞湯 1公升
蠔油 3湯匙
生抽 1湯匙
雞粉 半湯匙
冰糖 60g
薑片2塊
蔥段 3-4段
水 適量
左邊係啡邊鮑，右邊係青邊鮑
做法：
1. 將鮑魚洗淨備用。
2. 雞腳和瘦肉沖洗後先出水，備用。
3. 準備一個中型煲，將所有材料加入。
4.水量要蓋過所有材料，煮滾後先試味，再再慢火炆。細既鮑魚炆約2小時，大青邊鮑炆約4小時。
5. 炆好之後，倒出適量湯汁，再小煲煮熱再打生粉獻，煮成濃醬汁，淋上鮑魚即可。
雞腳炆好後，也非常好食，膠質十足！
