2015年11月29日 星期日

煙三文魚一口脆餅小食(簡易版)



聖誕節好快就到,阿妹你咁多朋友,一定有好多大大小小既party 要去,有時可能要準備野食齊齊分享,今次就分享一個免開爐,15分鐘簡易版既煙三文魚脆餅小食俾妳,分量同做法都好有彈性,只要選擇比較好既材料,就一定會成為受歡迎既派對美食!





材料:(一筒餅乾既分量)
任何細塊脆餅乾  1盒
Cream cheese  1盒
牛油果 1 個
煙三文魚  200-300g
香草(新鮮/乾燥) 少許
黑胡椒碎  少許
靚大平碟/盤  1個


做法:
1. 將每塊餅乾都擦上一層Cream cheese,排好係碟/盤上




2. 用膠刀切牛油果,放一小片係餅上
用膠刀切,咁牛油果就無咁易氧化變色




3. 用手或較剪將煙三文魚撕成細塊,放上餅上




4. 灑上香草同黑胡椒碎
5. 成功!

姊姊心得:
*唔用餅乾,可以用青瓜片


呢個係我上次公司Party整既,一盤係青瓜底,另一盤係小多士~

*無牛油果就可以唔用
*煙三文魚可以換成熟蝦(cocktail prawns)或者火腿
*想貴氣D可以加魚子醬或金箔上面
*如果搵買唔到cream cheese, 可以用日本BB沙律醬代替,但份量要減少,因佢比較濃味
*如果有時間,可以先將cream cheese 同少量忌廉(比例大約10:1)連埋香草(Dill時蘿/Parsley)同鹽一齊用mixer/blender 打均,加強味道





2015年11月27日 星期五

*銀魚仔臘腸排骨煲仔飯*


終於開始有冬天feel,最岩食煲仔飯~~
係香港想食煲仔飯好容易,
但你人在澳洲
….唔係話落街食就有
今次就等我呢個做妹既教你啦!!
下次可以煮俾你老公食
~微微既飯焦佢實會好中意~

2015年11月26日 星期四

[好物推介] YOSHIKIN 具良治 GLOBAL 日本專業主廚刀


家姐我有好野推介俾大家,
就係YOSHIKIN 具良治 GLOBAL 日本專業主廚刀。
我今次
買既係30週年紀念版 13cm 既廚刀。
之前一直都知道呢隻日本刀好出名,
但一直都覺得貴,一直都唔捨得買。
(但係買其他煲煲鑊鑊又唔會話貴~~ 哈哈~~)
今次見到網上有折上折,最後
都係AU$40 (原價AU$89),
就決定買一把試下,睇下係咪咁好用。




收到貨幾日都未捨得用,
因為想等到一樣特別既食物先同佢開封,以示尊重XDD"

等到尋晚,老公又捉左幾隻龍蝦,
終於我就決定用龍蝦同佢開封,
兼試下係咪傳聞中咁厲害!


把刀攞上手好輕,把手好好握,
13cm 係刀鋒既長度,所以係中型既刀,唔算太細。

我第一樣測試係用佢起左龍蝦身上橙紅色個塊衣。
平時我用開既泰國Kiwi 刀,都算好利,
但都唔係咁易做到,好多時都起左埋D肉。



龍蝦身上橙紅色個塊衣,好難



今次試用呢把具良治,真係非常好用,
好輕易就起到塊衣,乾脆利落,唔會起埋到塊肉。
同埋我發現,因為呢把刀係「一體成形」,
唔係刀加刀柄,所以用既時候力度同角度比較易控制,
感覺比較刀手合一。


我整咁多次龍蝦,都係第一次好成功咁去到塊衣!
好有成功感!!
因為食龍蝦刺身,塊衣清唔乾淨就唔好食。

真係有D後悔唔早D買,同埋應該襯減價買多幾把,
因為阿妹話香港都貴賣好貴~~~
而家唯有好好用住呢把先,
等聖誕節boxing day 減價再買。




2015年11月25日 星期三

紅棗花生雞腳眉豆瘦肉湯



自從上年開始,我每星期最少都會煲一煲湯。
除左因為有小朋友,多飲湯比較有益,
重因為妳姐夫上年唔知傾開D咩,
忽然就講其實佢好鐘意飲湯。
但我地一齊咁耐,都唔知佢原來鐘意飲湯,
以前一年都未必煲到10次,
而家佢開到口,咁我就努力煲~~

不過自從經常煲湯之後,
覺得食飯有湯感覺又真係比較圓滿~~
飲到老火湯或中式湯水,
係好自然會覺得好幸福,好有家既感覺~

原來除左食紫薯雲尼拿慕絲蛋糕 , 薑汁燉蛋有幸福既感覺 
一煲靚湯都有相同幸福感覺。

今次我想同你分享呢個湯,係妳阿媽,
亦都即係我阿媽教我既,不過我自己再加埋紅棗一齊煲。


材料:
新鮮雞腳 8-10 隻
瘦肉/豬骨300-400g
花生 40g
眉豆40g
紅棗 4-6 
薑 1 小塊
水12 碗(約2.2-2.4公升)

做法:
1. 紅棗、花生同眉豆沖洗後,先浸水備用
2. 雞腳同豬肉沖洗之後,出水備用
3. 將水放入湯煲,雞腳同豬肉隨水落
4. 開大火,水煲滾之後落紅棗花生眉豆同薑。
5.水再次滾起之後,較小中火,煲大約2個鐘至2個半鐘
6. 煲好之後,可以落適量既鹽調味,飲得!


姊姊心得:
*浸紅棗、花生同眉豆既水,不要加入湯
*紅棗要
*雞腳的爪尖要記得斬,一來好睇D,二黎爪尖比較污糟



2015年11月23日 星期一

*紫醉金迷*--紫薯雲尼拿慕絲蛋糕




Wowowow~~~!!!!!!!!!!!!!見到完成品自己都勁興奮!!!超靚靚~~
淡淡既紫薯味,配上幼滑既雲尼拿慕絲
每一啖都有滿滿既幸福感~
今年聖誕可以整黎做派對甜品,
又或者同三五
知己係屋企high tea~~
諗起都開心,家姐都真係你一定要試呀!

 蛋糕材料及做法同早前綠茶紅豆卷蛋一樣,不過減半~


蛋糕材料 (6件份量,闊6cm):
雞蛋           250g (4-5)
糖               85g
乳化劑       13g
低筋麵粉   115g
紫薯粉       20g
              12ml
菜油          12ml
紫色色素  少許

雲尼拿慕絲材料:
牛奶              100ml
                  30g
雲尼拿香油   1湯匙
忌廉              200g
魚膠片           8.5g

紫薯蓉材料:
紫薯    150g
忌廉    50g


裝飾材料:
食用金箔    一小片

做法:
 雲尼拿慕絲:
1.      魚膠片用冰水浸丈軟,將忌廉打至企身
2.      牛奶小火加微熱煮溶糖,
      熄火利用餘溫溶魚膠片及加雲尼拿香油
3.      加忌廉均勻攪拌,放入雪櫃約20分鐘
      雪到比較
及企身

 蛋糕:
4.      把雞蛋,乳化劑,糖用打蛋器攪拌至杰身
5.      將麵粉過篩一次
6.      將麵粉及紫薯粉倒入雞蛋糊中,再用打蛋器攪拌至杰身
7.      慢慢倒入油及水,攪拌至完全均勻
8.      逐少加入紫色色素至理想顏色 (焗完後顏色會比較深)
9.      焗爐180C預熱10分鐘
10.   長方盤牛油紙鋪底,將麵糊倒入焗盤
11.   將麵糊在焗盤上均勻地推平(蛋糕約1.5cm)
12.   160C8-10分鐘
13.   出爐後,撕去牛油紙,把蛋糕嘆涼
14.   利用模具用刀界出圓形(每件紫醉金迷需2件圓形蛋糕)


15.   片去蛋糕金黃面

16.   將蛋糕放入模具底部,倒入雲尼拿慕絲,
     再鋪多一塊蛋糕
(不要太大力按壓,以免慕絲漏出)


17.   放入雪櫃雪至少4小時


 紫薯蓉:
18.   洗乾淨削皮後,切簿片蒸15-20分鐘至軟身

19.   利用hand blender把紫薯片加忌廉打至幼滑
 
裝飾:
20.   4小時後,利用火槍快速向模具燒一圈
     (
真係要快手,約2),以便脫出模具

21.   將紫薯蓉放入唧袋,於蛋糕頂部唧一圈
22.   利用牙籤將少許食用金箔放置頂部裝飾
23.   終於食得喇!!!!


妹妹心得:
*市面上有好多紫色外衣既紫薯,但其實薯肉係黃色架,
  街市比較少紫薯
; 今次我係一田買,
  有
3-4款都係紫色皮,但得1種係紫肉,
  所以購買時一定要問清楚
*因為紫薯粉係增加蛋糕味道,不能令蛋糕變成紫色,
  所以要加小小食用色素,唔加亦唔會影響味道,
  但蛋糕就會係金黃色
*利用火槍時一定要小心同快手,
  因為燒得慢,雲尼拿慕絲會溶,

 
如果冇火槍用熱毛巾敷亦可
*食用金箔,食用色素及乳化劑一般烘焙店有售

2015年11月21日 星期六

*霸氣排骨*

























有冇發覺蒸排骨黎黎去去都係豉汁?
蝦醬?梅菜? Or麵豉???
有時都悶悶地
之前睇左韓國一個廚師煮野食節目...
見到廚師用左個特別方法整排骨~
我就參考左佢既做法,改良少少,夾返自己口味!!!
就煮成呢道「霸氣排骨」啦!!
軟綿綿既糯米+微辣既豆瓣醬!!
真係意想不到咁好味呢~

2015年11月18日 星期三

'芝士肉醬焗意粉'




呢幾日工作都好忙,跟著屋企又好似有唔同既野做,搞到我尋晚唔記得準備今晚要食晚野,放工返到去,打開雪櫃,得一盒牛肉碎。

你都知我每日煮飯時間得45分鐘到一個鐘左右,所以前一晚我一定準備好晒,但今日係得一盒碎牛既情況下,又要準時開飯,就只好出煮快餐既絕招---肉醬意粉!

如非必要,我其實係好少煮意粉,因為佢係煮快餐既必殺技,所以我會留返重要關頭先出手,咁煮完出黎擺靚仔佢,食果個(即你姐夫)就會覺得我係一早plan好煮意粉,而唔係臨急臨忙整既~呵呵~

呢個意粉30分鐘內一定煮好,而且材料簡單,屋企一定有~



材料:
肉碎   250-300g
意粉   半包(250g)
芝士   適量
粟米粒 (罐頭/急凍) 適量
意粉醬 

調味料
鹽 2-3 茶匙
胡椒粉 少許


做法:
1.  先在一邊爐頭煲2公升水,水滾落鹽煮意粉,保持中大火,唔好蓋
2.  另一邊爐頭,開鑊落油,中火炒肉碎,中間落少許胡椒粉調味



3.  炒到肉碎8成熟,轉中小火,就落粟米粒同意粉醬撈均,煮到意粉醬熱,出煙微滾,就可以關火
4.  意粉跟據包裝上寫既時間煮好後,撈起放上焗盤,再將意粉肉醬淋上面,輕輕咁撈均




5.  芝士放面鋪好,放入焗爐做烤(Grill mode),200度烤5分鐘,直到芝士溶同轉金黃就可以



6.  上枱先灑些少乾既paisley,就靚仔晒,食得!


姊姊心得
*肉碎用豬、牛都無所謂
*無肉碎,隨手屋企有既腸仔、煙肉都可以
*而家大部分意粉都唔洗過冷河,用鹽水煮好,就可以直接加汁或炒
*煮意粉唔想意粉痴埋一齊,水分量要多,用水滾既衝力,令意粉分開唔痴埋。唔洗落油,無用架~








2015年11月17日 星期二

*薑汁燉蛋*




最近香港天氣乍暖還寒,
下午有時好熱,但夜左又涼返好多
~~~
有時早左食完飯…..睇下電視又想搵D甜品食下~
今次分享既甜品,利用屋企多數都會有既材料….
30
分鐘有得食,食完成個人暖笠笠!!!
知家姐你係澳洲成日6點就開飯(我放工仲返緊屋企囉~)
哄完阿仔訓覺,拿拿聲整返個甜品同姐夫Sweet下啦!!


2015年11月15日 星期日

'龍蝦膏蒸水蛋'



呢期上網見到個個都食大閘蟹,
見到隻隻都爆晒膏,流晒黃咁,真係睇到我流晒口水~ 

重記得上年專登係10月尾返香港,
就係為左食大閘蟹,不過今年,
就只可以隔住個mon 睇人地食......

好彩,無蟹膏,都重有蝦膏~
妳姐夫呢期好勁,今年澳洲既龍蝦季啱啱開始,
佢就捉到唔少,尋日又捉到幾隻生猛新鮮既,
所以我都唔客氣,即時劏晒佢,整返個「龍蝦
蒸水蛋」,
慰藉我對「膽固醇」既渴求~


2015年11月11日 星期三

'終極港式茶餐。沙嗲牛肉'


嘩~~~我都唔知等左幾耐,先可以做到呢個終極食譜!!

妳家姐我如果要係柏斯食港式早餐B -- 沙嗲牛面,
真係飛返香港食重易D!

但上次我返香港食,一碗面得少少沙嗲汁同幾粒牛肉,
完全都唔夠喉。呵呵~~ 今日之後,想食幾多都有!
實在太興奮!!


不過當我好開心咁煮到之後先發現,原來你姐夫係唔"好"沙嗲牛,因為佢食開早餐C -- 雪菜肉絲米......

2015年11月9日 星期一

*明爐酸菜滾魚腩*

家姐妳平時煮D餸咁勁~~好彩今次我都唔弱~~~
妳用"上火碟"整玉子豆腐,
我就用同一款碟就整呢個充滿鮮味既滾魚腩~

呢道菜看似好複雜但其實唔太難,只係材料稍多~
自己係屋企整完全食到魚既鮮味!!而且不加味精又少油!
仲可以自行調教辣味~絕對健康又美味!!!

2015年11月7日 星期六

*鮮百合海底椰蓮子糖水*



香港天氣呢期好乾燥呀成個人都好乾爭爭咁~~
分享呢個超潤既糖水
飲返碗舒服晒!
 
但係澳洲有冇鮮百合同海底椰賣架??哈哈~

2015年11月4日 星期三

'醬爆鐵板玉子豆腐'


阿妹,上次買俾妳隻上火碟,好似無聽到妳話用過既? 妳唔好諗住只係Pepper Lunch或者明爐烏頭先用到,其實佢用黎煮其他餸都可以發揮佢既獨特好處,今日我就教妳整個「醬爆鐵板玉子豆腐」。

呢個玉子豆腐係我地係呢邊唐人餐館食過類似既鐵板豆腐,跟著妳姐夫同我就一齊研究係屋企無鐵板可以點樣整,最後俾我諗到用隻"上火碟"就得,所以呢隻碟係呢個餸既靈魂~

2015年11月1日 星期日

*抹茶紅豆卷 & 芝麻紅豆卷*

剛剛呢個星期六日好鬼忙碌! 
今日又到星期一,又要努力返工喇~~
見今日係Green Monday
就分享一個零失敗又好味既「抹茶紅豆卷」比妳睇下~
我做
細妹既對妳幾好~呵呵~