2015年10月30日 星期五

'惹味36小時。燒雞翼'





最近我測試左幾個唔同雞翼既食譜,
試左好幾次之後
終於比我研究到呢個最滿意既調味比例~~


呢個雞翼食落味道好有層次,好惹味!!!
如果你有BBQ活動,整呢個雞翼去燒,
實成為當日最佳煮角~~~


你一定要跟足份量早1 至2 日醃定,
因為呢個食譜有好8種調味料,
所以跟足份量同醃既長短係好重要!


如果要做唔同既份量,就跟比例加減,
每一份係6 隻雞中翼(偏大SIZE)。
今次分享
係常用既兩份既份量。


2015年10月28日 星期三

*栗子炆雞脾*



由細到大我都好鍾意食粟子,有栗子食既餸,你都會讓我食!
今次就等我將媽咪教既煮法加埋我既調味料傳授俾你
等你係外國都可以食到媽咪飯味~~

栗子是碳水化合物含量較高的乾果品種,能供給人體較多的熱能,並能幫助脂肪代謝,具有益氣健脾,厚補胃腸的作用,而且含有豐富的維生素C及蛋白質呢~




材料:
   雞脾       3隻切件
   栗子        半磅
   乾蔥頭    2大粒切碎
   薑片       3-4片
   蒜頭       3-4粒切碎

調味料
  蠔油        2湯匙
  老抽        1湯匙
  豉油        2湯匙
  冰糖        2粒(5毫子size)
  味林        3湯匙
  燒酒        2湯匙


醃料:
  鹽        1茶匙
  糖        1茶匙
  醬油     2茶匙
  生粉     1湯匙
  胡椒粉   少許
  麻油       少許

做法:

 1.    落油爆香乾蔥頭,薑片,蒜頭
 2.    落雞脾炒,直至表面變色
 3.    畫一圈咁落燒酒,可以僻走雪味
 4.    加栗子再炒一陣



 5.    落餘下既調味料,再加水(水要蓋過材料9成)
 6.    細火炆15分鐘
 7.    開蓋檢查有無乾水,可以試味
 8.    細火再炆5分鐘,熄火(不要開蓋)焗大概10分鐘,利用餘溫令雞脾更入味
 9.    加蔥花,

妹妹心得:
*用LC/Staub煲鎖水同儲熱功能強,所以唔需要落太多水,
  如果用其他就可能要加返多少少水同時間炆耐D~
*同埋煮呢個餸記得要煮多D飯呀~~因為真係好好味,好送飯呢~
開飯食得!!!

2015年10月25日 星期日

'南瓜巴馬火腿磨菇酥皮撻'



黎緊星期六就係萬聖節,即係2015年又好快就過去,每年到呢個時候就會開始回想下有D咩今年想做又未做既,想盡力用埋去,但多數都係趕唔切,最後都係會變成出年既新年目標~~ ^o^~ 我今年本身計劃左幫個客廳油油,但睇黎都係出年先做到......

講返萬聖節,我地澳洲呢邊都係近5/6年先有大事宣傳呢個節日,鋪頭會有佈置,掛下蜘蛛網、骷髏骨,同埋都會出下南瓜味既野食,或者係橙色既特別板產品~~

但認真,我咁怕鬼怪恐怖既野,對呢個節日真係一D興趣都無。唯一好處就係超級市場多左好多南瓜賣,又平又靚,可以整好多南瓜湯、南瓜蒸排骨、南瓜湯圓、南瓜西米露⋯⋯

妳整呢個原盅南瓜豬扒咁正,我又教妳整我呢個南瓜撻,做法簡單,賣相又靚,做早餐或者下午茶都一流!! 萬聖節整完,聖誕節再整都無問題~




材料:
    1
南瓜   450g (去籽去皮後大約420g)
磨菇   50g
火箭菜  少許
急凍酥皮   3
巴馬火腿  2-3
Feta Cheese    20g
鴨油/ olive oil    1湯匙



做法:
1.  酥皮先解凍,備用




2.  南瓜去籽去皮,切細粒,大約半隻麻雀咁大


南瓜皮好硬,要小心切,好似相中,切件後平放,用細刀仔慢慢切


3.  預熱焗爐180c,將油同南瓜撈埋,放入焗爐焗20-30分鐘,直至煮淋同轉金黃色就可以出爐備




4.  磨菇切薄片,Feta cheese 切碎,巴馬火腿用手開,變成細片
5.  將酥皮放係baking paper上面,好似圖中咁,用刀背係四邊畫出約1.5cm 既邊界,係四邊擦上蛋液,呢個係個撻邊,中間酥皮用叉輕輕咁手插十數下,用作用係防止中間酥皮升高




6.  隨意將煮好既南瓜粒、磨菇、Feta cheese巴馬火腿放係酥皮上




7.  放入焗爐200c,焗10-13分鐘,到四邊酥皮轉金黃色就可以出爐
8.  上碟前將火箭茶放上面,就食得



食既時候,卷起食就最方便,一啖有齊所有料



姊姊心得:
*呢個撻可以整一大個做一人主菜份量,又可以將酥皮一開四,就細個既party food 份量
*呢個撻集合所有食材既天然味道,(南瓜甜、火腿同芝士咸、磨菇同酥皮香,重有火箭菜爽脆同甘甘地味)所以唔需要加任何調味料
*最好前一晚整定南瓜粒,咁到正式整撻果陣就快好多
*如果唔落Feta cheese,可以落其他芝士,但就選擇比較實,無咁易溶既芝士比較好,如果唔係,就會變成酥皮Pizza(雖然都一樣咁好味~~)
*酥皮果四邊可以選擇向內摺,或者打平唔摺,我2隻都試左,分別唔大
*鴨油用黎焗薯仔南瓜係特別香,我今次試又好似係香D,但用其他油都無問題

2015年10月22日 星期四

*哈囉喂: 原盅南瓜黑豚豬*



就黎又到Halloween!!
雖然我地細個果陣都冇咩理呢樣野,但而家香港呢幾年halloween都大行其道咁~ 好似一大盛會咁~~
你地澳洲果邊有冇慶祝呀?? 你會唔會同你個仔裝扮下去玩trick or treat ?

Halloween其中一個主角當然係南瓜啦!
不如我地一人一個南瓜食譜,同大家happy share^^
今次就由我黎先!

2015年10月21日 星期三

台式蕃茄炒蛋



妳呢幾日有無留意FB,我見到有人煮蕃茄炒蛋,竟然係炒烚蛋!唔知係搞笑定真係有人咁煮,如果係真既,又真係好有創意!

其實我都好經常呢個餸,因為蕃茄既茄紅素真係對身體好好,而且有汁既餸都係比較好送飯既,好啱我屋企個2個一老一嫩~

我知每個屋企既炒法都唔同,有蕃茄煮到爛加滑蛋、有D就一舊舊蕃茄加熟蛋~~ 
我都唔記得我地阿媽煮洗係點,因為都好耐無食過,但我就鐘意蕃茄煮到爛加滑蛋,而今次呢個台式炒法係一個台灣男仔教我既,我發覺呢個加左洋蔥同蔥既炒法,同蕃茄蛋好夾,而且增左呢個家常菜既營養價值。 

2015年10月19日 星期一

*咸蛋肉餅山*



我見到你個芝麻味panna cotta,整得唔錯,重擺得好靚,係有D水準~

我無偷懶架,不過有時唔係日日都係屋企食,所以先未交功課之嘛,等我~~

今次share既呢個餸源自一間茶餐廳~
佢地將平平無奇既肉餅,轉一轉形象,
整高左,靚仔左,即刻吸引左好多~


其實屋企整都好容易!!!
仲可以加自己喜歡既配料~
大人小朋友都一定都鍾意,你一定要整俾你個仔試下~~


材料:
梅頭肉  半斤(300g)
馬蹄    5-6
咸蛋     1
蔥花 適量

醃料:
    半茶匙
     1茶匙
醬油    1湯匙
老抽   1茶匙
生粉    1.5茶匙
胡椒粉       少許
麻油         少許

做法:
1.      先把梅頭肉洗淨切細件,
         一
半放入碎肉機攪碎,另1半就切細粒刴。
        (
當然也可以請肉檔攪碎)



2.      將豬肉醃最少2小時 (我習慣前1日預備,醃過夜)
3.      馬蹄去皮切碎,撈入豬肉攪勻
4.      將豬肉放入飯碗,壓一壓佢



5.      用碟蓋住倒轉,令肉餅成山形
6.      用手指係頂位輕輕按,形成個凹位



7.      大熱滾水蒸爐先蒸10分鐘
8.      咸蛋黃放頂部凹位置,再把蛋白淋下
9.      再蒸15-20分鐘 (如果蒸爐請用110)
10.   灑上蔥花,食得啦!

妹妹心得:
*因為我喜歡較有口感既肉餅,
 所以有時間就會1半自己攪碎 (多謝你個迷你攪攪機,好方便),另1半自己刴,
  偷懶既係肉檔攪碎or直接係超市買免治豬肉都得
*買梅頭要有少少肥,蒸出黎先夠香有油份好味
*唔喜歡馬蹄,可以加土魷

2015年10月18日 星期日

"泰式甜酸蝦球"


呢個週末整完你個奶凍甜品,真係好得!我轉做芝麻味一樣咁好食!麻煩你再努力跟師傅學野,教我整多D!


同埋,我share左既食譜,你都唔好偷懶,要交下功課先得架~

講開又開,妳有無發現,唔知幾時開始,可能係我地我嫁左之後,每次返親屋企食飯,媽咪都煮好多好餸,有有蟹有蝦魚有肉有菜又有湯,次次都食左飽飽好滿足。而家諗起都留口水~~~


但妳記唔記得,我地細個個陣,久唔久就聽到媽咪話「哎呀,今晚唔夠餸,家姐幫手開罐頭午餐肉加餸」又或者開飯既時候,一人一隻荷包蛋做餸。果時我都會諗,點解會唔夠餸既呢?唔通我地好窮?

但當我做左人地老婆,再做埋人地阿媽之後,發現,煮煮下飯又真係會唔夠餸,好似今晚咁,本身就準備左菜同雞翼,同埋次前一晚既2舊牛仔骨。開頭都以為夠食,但煮煮下,又發現好似唔多夠。

但因為已經有肉,唔可以開午餐肉,雞蛋又啱啱食晒,唯有打開冰箱,睇下有咩可以即煮,跟住比個搵到包蝦,嘩~ 正呀!就整左個快靚正既泰式甜酸蝦球。




材料:
蝦仁    12-15 隻
洋蔥    半個
紅蔥頭   1-2小粒

調味料:
泰式雞醬   3-4 湯匙
水   1-2 湯匙
糖    少許
米酒    少許

做法:
1. 先將急凍蝦仁浸水快速解凍,大約10分鐘
2. 蝦仁解凍後,用廚房紙索乾,再少少鹽同白胡椒粉撈勻
3. 洋蔥同紅蔥頭都切薄片



4. 中火開鑊,落油炒洋蔥同蔥頭,炒到變軟身就上碟備用
5. 仍然中火,落油炒蝦,炒到一半熟,即蝦身一半透明一半白色既時間,落少少酒去雪味
6. 之後較細火,落雞醬、水同糖,炒勻再加埋之前炒好既洋蔥蔥頭
7. 較返中火,炒到蝦仁熟就可以上碟


姊姊心得:
*洋蔥屋企係必備,係煮快餸既好幫手;
*無蔥頭就可以唔落,無雞醬可以用沙茶醬、沙嗲醬或者茄汁都得。
*有殻蝦都得,做法一樣,但醬汁分量要多D,同記得挑腸。





2015年10月15日 星期四

*伯爵茶意大利奶凍* Earl Grey Tea Panna Cotta



一頓豐富既晚餐,當然要有個甜品畫上完美句號啦!!
知你間中屋企都要宴客
等我教你呢個超簡單材料,就可以做到酒店級既甜品!!
真係very easy!

材料:
 淡忌廉    250g
 鮮奶       250g
 糖            50g
 魚膠片     10g
 伯爵茶葉  20g

2015年10月14日 星期三

"蟲草花雞肉臘味荷葉飯"



嘩~ 你煲雪耳糖水個朵雪耳好大朵,
搞到我都忍唔住要搵下我屋企D存貨。

本來諗住可以同你鬥大,但原來我無晒大雪耳,
得返細粒既 :( 麻煩下次入貨預埋我~

但搵搵下,俾我搵到有幾塊荷葉
係上次話煲荷葉水可以去濕減肥果時買
之後煲左一兩次就無再整,包野擺到差D都唔記得佢存在。

見到佢,想煮野用左佢,唔好再擺,我第一時間諗起糯米雞,
但我老公又唔係好鐘意食糯米,阿仔咁細又怕佢難消化,
所以就決定簡單直接就咁整個荷葉飯,煮好一碟上台就得
慳返好多洗碗時間⋯呢個好野,就益下你,一齊偷懶!
重有唔該你上次幫我托隻LC 32cm媽咪鑊黎,
我先可以咁有火侯炒飯!
















2015年10月12日 星期一

*桂花雪梨雪耳糖水*




香港開始入秋lu~~涼涼地好舒服….但同時乾燥要滋潤返~
雪梨有潤肺清燥、止咳化痰功效;  
雪耳就滋補生津,補肺益氣
而且雪耳含有天然膠質,加上滋陰,食多D皮膚都靚D~


"金銀蛋菠菜"






我有時都好羨慕妳,係香港有隨便落街都有好多野食
我地係澳洲,新餐廳又唔多,舊既就食黎食去都係果D
有時想出去食,但一諗到又係食果D野,就會寧願返屋但求其煮~


同埋唔知你有無留意,我每次返香港既時間
都會食D好中國既蔬菜。好似油麥菜、小白菜、菜心、絲瓜、莧菜....
因為係呢邊連菜既選擇都少,就算有芥蘭(超幼)、菜心(西芹咁長)
小棠菜(其實係大棠菜),仲要無香港賣既咁好食⋯

2015年10月11日 星期日

"芝士煙肉焗蠔"




今次呢個食譜係: 芝士煙肉焗蠔

呢個焗蠔簡直係「識少少扮大廚」既入門首選!
材料簡單,做法直接。
第一次交換食譜就先黎個成功率高既先喇,唔係一陣妳話我大蝦細,俾個食譜你唔識煮~~~~

蠔,係一樣好有營養既食物,高蛋白低脂肪,包含有人體必需的8 種氨基酸,可以提高機體免疫力,重好保架~~
知妳唔係咁鐘意生蠔,呢個熟食法啱晒你
~



姊妹。交換食譜。由來



姊姊的話:
其實一直我地想有一個食譜BLOG,分享下我咁多年既自學煮飯心得
但我份人又好「三分鐘熱度」所以一直都係得個諗字。

直到上星期,我地兩姊妹無聊傾開最近煮左咩新餸,
點樣煮既時候,忽然覺得其實我地兩姊妹可以一齊開個BLOG,交換下食譜。
咁之後就可以隨時睇返,又可以介紹下俾朋友,齊齊交流下
唔洗下下想煮某樣野既時候,又WHATSAPP問一大輪嘛~~

***********************************************************************************************
妹妹的話:
媽咪係我地屋企既大廚!!!
佢冇去學過烹飪, 但為左我地一家,佢會成日研究煮好多好餸我地食....
細細個我已經有入廚幫媽咪手....耳濡目染下我都學到唔少野!!
哈哈~媽咪而家話我醃肉仲好味過佢呢!
做左靚太後...另一半好喜歡係屋企食飯~為左佢努力研習各種菜色!
加上被家姐毒到愛上Le creuset, 買左靚廚具,梗加要好好發揮!!
姊妹週記~好好紀錄我地用心為我地愛既人煮既每一道餸菜!
多多指教!!