自製香口魚鬆

之前買左麵包機，除左麵包之外重可以整果醬。

但上網時發現，原來佢重可以整炒魚鬆！

呢個簡宜真係天大既喜訊，
因為係澳洲很難買到好食既魚鬆或豬肉鬆，
買到既又未必好食同埋一定好貴，
所以如果麵包機可以成功咁整到魚鬆，呢次真係無買錯喇！
以後食粥，炒飯都可以加魚鬆，諗到都開心~~　

家姐我一共整左4次，每次都好成功，
而且每次我都嘗試唔同既比例、分量同調味料既組合，
都有唔同既效果，而家等我又分享一下我既做法～

材料: 
罐頭呑拿魚          300g

白糖                      75g

甜醬油/蒸魚豉油 10ml

豬油/鴨油             1茶匙

做法:
吞拿魚倒出，隔去水份，再盡量將魚肉的水份榨出。

麵包機做法：

將所有調味料連同呑拿魚肉一次放入機，用果醬模式(Panasonxx) 就可以。（約2小時）

人手做法：

準備一隻平底鑊，加入所有調味料連同吞拿魚肉，
做小火慢慢炒，把魚肉鏟開鋪平於鍋底；
大約每30秒再翻炒一次，
直到炒至金黃色同香脆就完成！
（慢炒太約45分鐘 -  1小時）
(用易潔鑊會比較好，用LC炒好易過熱，變焦~)

完成後的魚鬆，需要先放涼，才可入樽或盒包好保存。

姊姊心得：

*豬油或鴨油就最好，如果用植物油（橄欖油）代替，
成品會少一份香

*白糖同魚肉比例大約一比四，糖太少，
味道會比較腥，同埋顏色會比較淡。