2016年9月4日 星期日

現場觀賞--日本師傅劏吞拿魚



上星期日,家姐我就同朋友去咗睇日本師傅劏吞拿魚表演。

估唔到唔使去到日本,係澳洲都有得睇。


今次表演係一間柏斯著名嘅日本迴轉壽司餐廳舉辦,好似一年有幾次,但係家姐我都係最近先知道。

吞拿魚平時見多數都已經係切好晒一塊塊,諗下又真係好似從來冇見過完整一條嘅吞拿魚係咩樣,既然今次有大好嘅機會又唔使錢當然要去睇下啦。

表演五點鐘開始,我哋大約四點半就已經到啦,嗰陣已經有10幾人係門口排隊,好彩我地都算早,可以搵定個靚位睇清楚。

等左一陣大約4:50,就有四五個職員搬條魚入去鋪頭,

嘩~條魚真係好鬼大條要成四五人先搬得郁~







五點鐘就準時入場,大家都好有禮貌、有秩序咁入鋪頭各自搵個靚位等開始!在場有日本人,有啲亞洲人,重有本地人,果然大家對條吞拿魚都非常之有興趣!

開始喇~職員首先歡迎大家,跟著就做咗個簡單嘅介紹。

原來呢條魚有成55公斤咁重,年紀大約五至六歲。唔好睇佢咁大條呀,原來佢係水入面最快可以游到時速80公里架~

係正式開始之前,日本師傳師傅就首先將條魚擺靚仔,俾大家齊齊影張靚相兼睇清楚條魚!


咁精采嘅劏魚表演,當然係睇片最好啦,去片





https://youtu.be/VZ67c0uxni4


睇完咁特別既劏魚表演,即場當然有美味嘅吞拿魚飯食啦!
仲有好受歡迎嘅吞拿魚腩壽司添!咁好既機會,我哋梗係睇完又食,食完又買埋返屋企啦!



新鮮Toro手握壽司! 食完重可以買返屋企再嘆過~~

如果大家下次黎澳洲柏斯旅行或探親,夾到時間既,推介大家去睇下食下,值得一睇~~






























沒有留言:

張貼留言